محمل الجد

كلمات الشاعر / حاتم حمدان العبادي

ياماخذ الدنيا على محمل الجد
نوّخ ركاب الهم واسعد بدنياك

فان عشت عشت اليوم ماتضمن الغد
والباقي الله واحسن ليوم ذكراك

ترى الحياة اسرع من الجفن لاارتد
ماتحصد الا مازرعته بيمناك

ودام القناعة والرضا سلّم المجد
فالابتسامة لاتفارق محياك

‏واحرص على المعروف والشكر والحمد
والصاحب اللي يسعد بيوم لقياك

واحذر تعاتب فالبشر تسلم الرد
ترى البشر ماهم على كيف مشهاك

من دام لك يومين مادام لك بعد
كللن بهمه في حياته تعداك

لاتنكر العشرة ولاتخلف الوعد 
صون الامانة واجعل الصدق مبداك

‏والجار جارك وانت في جيرته سد
احفظ عهوده لو مع الوقت جافاك

واكرم سبال الضيف ياباغي السعد
جودك من الموجود والطيب يزهاك

وبالوالدين اوصيك ياحافظ العهد
في برّهم كم عارفن قبلي اوصاك

دوّر رضاهم لو على نسمة الورد
لاطف هواهم ياعسى البيض تغشاك

‏واليا استدنت بدين وقت الوفا رد
حال البشر مهما بدا الحال يخفاك

واحفظ صلاتك عطّر الليل بالورد
وعهد الزكاة اوفيه يوم الله اعطاك

وابذل حقوق الخير للصوم بالجهد
وحجك لبيت الله شكرته بمسعاك

واعلم ترى الدنيا طريقك لما بعد
فاعمل بها ماينفعك عند مولاك


‏‎الشاعر :حاتم العبادي

انتقل إلى أعلى